പുള്ളി പാവടയിട്ട ഒരു പെണ്‍കുട്ടി

വര്‍ത്തമാനം കേട്ടാല്‍ 
പാവം തോന്നും 
മിണ്ടാനും 
പറയാനും ഞാന്‍ മാത്രമല്ലേ ഉള്ളൂ 

എന്‍റെ സ്വപ്നത്തിലെ
മീശ മുളച്ചിട്ടില്ലാത്ത കൊച്ചു പയ്യന് 

ഏതോ ഒരാളുടെ സ്വപ്നത്തില്‍ 
കൊത്താംകല്ല് കളിക്കുന്ന 
പുള്ളി പാവാടയിട്ട
ഒരു പെണ്‍കുട്ടിയുണ്ട്

അവളോടുള്ള പ്രണയമാണ്
അവന്‍റെ സങ്കടം

ഇറങ്ങി പോകണമെന്നുണ്ട്
കൈ പിടിക്കണമെന്നുണ്ട്
കൂടെ കൂട്ടണമെന്നുണ്ട്

ഉണരുമോ
നടന്നെത്തുമ്പോഴേക്കും
ആ
ഏതോ ഒരാള്‍

അവര്‍
തിരിച്ചെത്തുമ്പോഴേക്കും
ഞാന്‍ ഉണരുമോ

അതുകൊണ്ട് മാത്രം
ഉറക്കത്തില്‍
ഞാന്‍ ഉണര്‍ന്നു നടക്കുന്നു

ഇനി പറയൂ
നിന്‍റെ സ്വപ്നത്തിലുണ്ടോ
കൊത്താംകല്ല് കളിക്കുന്ന
പുള്ളി പാവടയിട്ട ഒരു പെണ്‍കുട്ടി