ആകാശത്തിനുമപ്പുറം

പലപ്പോഴും
ചരിത്രം അങ്ങനെയാണ്  
കണ്‍നിറയെ കണ്ടാലും 
മിണ്ടാതെ പോയി കളയും 

അല്ലങ്കില്‍ 
ചൈനയിലേതിനെക്കാള്‍ 
വലിയ ഒരു മതിലിനെ 
ആകാശമെന്ന ചുരുക്കപ്പേരില്‍
ചുരുട്ടി വെച്ചതെന്തിനായിരിക്കും

**അപ്പനെ കണ്ടിട്ടില്ലെന്ന് കരുതി
അപ്പനില്ലാതിരിക്കുമോയെന്ന്‌ കുഴങ്ങും പോലെ

ഉണ്ടാവും
ആ മതിലിനപ്പുറവും

എന്നെപ്പോലെ ഒരു നീയും
നിന്നെപ്പോലെ ഞാനും
നമ്മുടെ കുഞ്ഞുങ്ങളെ പ്പോലെ
അവരുടെ കുഞ്ഞുങ്ങളും
പെയ്തൊഴിയുന്ന ഗ്രാമങ്ങളും ,
അടക്കിപ്പിടിച്ച നഗരങ്ങളും .

എങ്കില്‍
*നാരായണീ
മുകളിലേക്ക് ഞാനെറിയുന്ന
ചുള്ളിക്കമ്പ്
മതിലിനപ്പുറത്തു നിന്ന്
നീ കാണുന്നുണ്ടാവുമോ

അതെങ്ങാനും
നിന്റെ മുലകളില്‍ വന്ന്
തൊട്ടുവോ ..?
------------------------------------------------------------------

* ബഷീറിന്റെ കഥാപാത്രം
* *കുഴൂര്‍ വില്‍സന്റെ കവിതയില്‍ നിന്ന്