പ്ലാറ്റ്ഫോം

ആലപ്പുഴയില്‍ നിന്നും

ചെന്നൈ വരെ പോകുന്ന

ആലപ്പി എക്സ്പ്രസ്സ്‌

ഒരുമണിക്കൂര്‍

മുപ്പത്തി രണ്ട് മിനിറ്റ് വൈകി ഓടുന്നു

പുതിയ കാലത്തിന്‍റെ 

കമ്യൂണിസ്റ്റ് പച്ചപ്പോലെ 

ദുനിയാ കേ രഖ് വാലകള്‍

വീശി വീശി തോരാതെ 

കൈകള്‍ 

വണ്ടികള്‍ പൊട്ടുപോലെ

മാഞ്ഞു പോയിട്ടും

ആരൊക്കെയോ 

പൊതിഞ്ഞേല്‍പ്പിക്കുന്നു

മരുന്നിനൊപ്പം കഴിക്കാന്‍

കടും ചുവപ്പുള്ള ചുംബനങ്ങള്‍

കാണാനേയില്ല

ബോഗികള്‍ 

എണ്ണി കളിച്ചിരുന്ന കുട്ടികളെ 

ഏതോ ഒരാള്‍ വരാനുണ്ട്

അല്ലങ്കില്‍

ഏതോ ഒരിവള്‍

എത്രനേരമിങ്ങനെ

കാത്തിരിക്കും

ചായ

കാപ്പിയേ

കാപ്പി ചായേ.....

നമ്മള്‍

ചിലപ്പോഴെങ്കിലും

വെറും പ്ലാറ്റ്ഫോമുകള്‍ മാത്രമായി 

ഇങ്ങനെ മലര്‍ന്നു കിടക്കാറുണ്ട്