ഇത്രയും വലിയ
ഒരു മരുഭൂമിയെ
ആകാശമെന്ന്
ആരോ തെറ്റി വായിച്ചതാവും
മുകളില്‍
ആകാശവും
താഴെ
ഭൂമിയുമെന്നല്ല
താഴെ
ഭൂമിയും
മുകളില്‍
മരുഭൂമിയുമെന്ന്
തിരുത്തി വായിക്കണം
കേട്ടിട്ടില്ലേ
മരുഭൂമികളുടെ
ഭൂതകാലത്തിന്റെ
ആദ്യത്തെ വരിയില്‍ നിന്ന്
ഒരു മരക്കാലത്തിന്റെ നിലവിളി
അങ്ങനെ
ഓര്‍ത്തോര്‍ത്ത്
ആര്‍ത്താര്‍ത്ത് കരഞ്ഞാണ്
നമ്മുടെ തണ്ണീര്‍ തടാകങ്ങള്‍ നിറയ്ക്കുന്നത്
കണ്ടിട്ടില്ലേ
പുഴകൈകളില്‍
മുകളിലേക്ക് ഊന്നിയ വേരുകളുമായി
ഒരു മരക്കാലത്തെ.
ഭൂതകാലത്തിന്റെ
കണ്ണാടിയിലേക്കെന്നപോലെ
മുകളില്‍ നിന്ന് ഒരു മരുഭൂമി
നമ്മുടെ തടാകങ്ങളിലേക്ക്
ഉറ്റു നോക്കുന്നത് .
No comments:
Post a Comment