മകന്റെ ചിത്ര പുസ്തകത്തില്‍ നിന്ന്

ഏറെ നിറങ്ങളുള്ള 

ഉടുപ്പുകൊടുത്തിട്ടും

നരച്ചു വെളുത്ത 

ഈ വെള്ള ഉടുപ്പല്ലാതെ 

മറ്റൊന്നും വേണ്ട പകലിന്

ഇത്രനാള്‍ 

കറുപ്പുടുത്തിട്ടും

മടുപ്പുണ്ടാവില്ലേ രാവുകള്‍ക്ക്‌ 

ഇലയുടുപ്പൂരി

എന്നെങ്കിലും പൂക്കള്‍ക്ക് കൊടുക്കണം 

ആകാശ നീലിമയ്ക്ക് ഒന്ന് ,

ഉടുപ്പിടാത്ത 

മഴയ്ക്കും 

പുഴയ്ക്കും ഓരോന്ന് ,

മകന്റെ 

ചിത്ര പുസ്തകത്തില്‍ മാത്രം 

ഇവരെല്ലാ നിറങ്ങളും 

സ്വീകരിക്കുന്നു .

അവനത് 

അത്രമേല്‍ സ്നേഹത്താല്‍ 

നല്‍കുന്നത് കൊണ്ടാവണം