പനി

ഒഴുകിയൊഴുകി 

കാല്‍പാദത്തോളം

വന്നു നില്‍ക്കുന്നുണ്ട് 

ഒരു പുഴ .

നിറയെ മുടിയുള്ള 

ഒരു മരം 

ഒളിച്ചു വെച്ച കാറ്റിനെ 

നെറ്റിയിലേക്ക് 

പതുക്കെ പറത്തി വിടുന്നു .

സ്കൂള്‍ വിട്ട്

ഓടി വരുന്ന കുട്ടിയെപ്പോലെ

ഒരു ചാറ്റല്‍ മഴയെന്നെ

കെട്ടിപിടിക്കുന്നുണ്ടോ

ഓലപ്പുരയിലെ 

റാന്തല്‍ വിളക്ക്

"സരമില്ലടോ ,

സാരമില്ലടോ"യെന്ന് 

കണ്ണിറുക്കി കാണിക്കുന്നു .

ഇതളുകള്‍ വൃത്തിയായിയുടുത്ത്

സുഗന്ധവും നിറച്ച്

വേലിക്കരികില്‍ 

ആരെയാടി കാത്തുനില്‍ക്കുന്നതെന്ന് 

ആപ്പീസ് വിട്ട് 

വരുമ്പോഴും ,

പോകുമ്പോഴും 

ഞാന്‍ കളിയായി ചോദിക്കുന്ന 

അടുത്ത വീട്ടിലെ റോസാപ്പൂ

പനിക്കിടക്കയില്‍ 

പുതപ്പിനുള്ളില്‍ 

ഞാന്‍ 

വിറച്ചു തുള്ളുമ്പോള്‍ 

എന്തിനാണിങ്ങനെ 

തണുത്ത കൈത്തലം കൊണ്ട് 

കുറഞ്ഞുവോ 

കുറഞ്ഞുവോയെന്ന്

എപ്പോഴും

തൊട്ടുനോക്കി കൊണ്ടേയിരിക്കുന്നത്